اهلا اهلا موسم الامتحانات

>> Monday, December 18, 2006


أقبل موسم الامتحانات بكل فرحه وسروره وما يصاحبه من أعراض البكاء و الضحك معا و السرور والكابه سويا مع شويه امرأض نفسيه غريبه مش بتفتكرنى غير فى الايام الجميله ده وكانها تتبع مع سياسه اغنيه سيد درويش زورونى كل سنه مره بلاش تنسونى بالمره.
كل ماسبق هى أعراض لاحظتها على كل صاحباتى منذ احساسنا بان الامتحان خلاص كمان اسبوع وقدامنا مواد محترمه لازم نقوم بيها على أكمل وجه ،وكل واحده تكلمنى أحس أن عندها بلاوى الدنيا وكأ ننا راحين نتجوز مش نمتحن على اعتبار ان الجواز هو رابع المستحيلات -بعد العنقاء و الرخ و الخل الوفى -بالنسبه لشله اصدقائى ، وعلى الرغم من الاكتئاب المسيطر على كل من اعرفهم هذه الايام الا انى و الحمدلله كنت زى الفل وكان عندى شعور بالسعاده وانى مستمتعه بالمذاكره وانى مصممه اجيب تقدير السنه ده على عكس السنه اللى فاتت كنت بافكر ازاى اخلع من الامتحان باى طريقه ومنها دعائى ان الميكروباص اللى باروح بيه الجامعه يعمل حادثه ويبقى جات من عند ربنا، بس يا سبحان الله له فى خلقه شئون بين حالى السنه ده و اللى فاتت وتقريبا اختلاف حالتى عن كل اصحابى فى الوقت اللى كانوا عاوزين يروح لدكتور نفسى - كنت انا باسمع فيروز وباشرب كابتشيو وبارقص وانا باذاكر-لم يستمر هذه الاختلاف طويلا فبقالى اكتر من يومين عندى اكتئاب حاد لا اعلم سببه ومش طايقه كتاب وقاعده ابص من البلكونه زى البنوته اللى فى الصوره واسمع جبار واهو اك واحضان الحبايب لعبد الحليم و الحاله رررررررررائعه ونفسى اعيط ومش عارفه، عاوزه اعمل حاجه مش عارفه ايه هى اظاهر دخلت فى المرحله الخطر من اعراض موسم الامتحانات هو الاكتئاب ثنائى القطبين على راى ماما و المشكله مش عارفه اتكلم اقول ما لى بحالى و اللى مضايقنى اصابنى نوع من الخرس و الحديث عن الذات لدرجه ازعجت كل من حولى ده تكلمنى تقولى نبرات صوتك متغيره انا عارفه لما بتقولى الكلمه باسلوب معين يبقى انتى مبسوطه وواحده تانيه تقولى شكلك متغير مالك ؟
ماليش غير انى مش عارفه مالى مش عارفه اشكى واقول لحد حالى باهرب من اى حد يسالنى ولو سالنى وحسسته انى متضايقه باشعر بعقده زنب انى باضايق الناس بهمومى عشان كده قلت افضفض شويه مع المدونه اكلم نفسى يمكن احس انى افضل يمكن اطلع حاجات مش عارف لسانى يقولها لاصحابى .......... اللى هايقرا الكلام مش هايفهم حاجه وهايقول ده اكيد هلوسه امتحانات بس اللى حاسه بيه انى زى كلامى غير مرتبه فى افكارى فى الوقت الحالى وان فيه عشوائيه فى مشاعرى مش عارفه ايه سببها ولا ايه حلها، الشى اللى اعرفه دلوقتى انى هاقوم اسمع اغنيه الشمال الحزينه يمكن صوت فيروز يغير حاجه فى هذا الموقف المتأزم .

Read more...

مهرجان الهبل و العفونه فى جامعه المنصوره

>> Saturday, December 02, 2006


نظمت جامعه المنصوره المهرجان الأول للثقافه و الفنون فى الفتره من 25/11الى 30/11/2006تحت رعايه وزرير التعليم الواطى والبحث الخرافى هانى هلال وورئيس المهرجان الدكتور مجدى ابوريان و المفروض ان كان فيه برنامج للمهرجان يتضمن حضور فنانين وهم: محمد صبحى ورانيا فريد شوقى ومحمد رياض ويحيى الفخرانى و الاعلامي عماد الدين اديب و الشاعر فاروق جويده و الصحفى اسامه سرايا وولم يحضر منهم احد ده بالاضافه الى ان اللى حضروا الندوات وهم مصطفى الفقى و الدكتور محمد هدايه وهانى هلال لم يحضروا فى الاوقات المخصصه و المعلنه فى جدول برنامج المهرجان مما ادى الى فوضى فى باقى برنامج المهرجان اللى تضمن عرض مسرحيات لطلاب جامعه المنصوره ومسابقات فنيه بين الطلاب الجامعات المصريه وطبعا تاخر حضور الضيوف الكرام اثر على باقى البرنامج بالاضافه اللى ان هدف المهرجان الاساسى وهومشاركه طلاب جامعه المنصوره فيه لم يحدث لان بمنتهى البساطه لم يكن هناك اعلانات تذكر عن المهرجان وعن مواعيد برنامجه واماكن الندوات و العروض، اللهم الا بوستر غبى متعلق فى بعض اجزاء الجامعه مكتوب فيه اسم المهرجان ووتاريخ بدايته ونهايته وغير كده محدش يعرف حاجه وحتى لو عرفوا فهناك انعدام تنظيم بالمره بالاضافه الى عدم حضور ضيوف المهرجان و المفروض ان ده مهرجان تحت رعايه وزير التعليم هانى هلال مباشره ومع هذا فانه لو كان تحت رئاسه فراش كان هايبقى افضل من كده، وتم تلخيص المهرجان فى الحفلات الغنائيه المسائيه و اللى بدائها رئيس جامعه المنصوره بمطرب بحبك ياحمار سعد الصغير وختمها بمطرب قوم اقف وانت بتكلمنى بهاء سلطان وهكذا تلخص مهرجان للثقافه و الفنون فى شويه حفلات ليليه واتضربت الندوات مما ادى الى تضارب فى مواعيد باقى انشطه المهرجان
ولم تكتفى اداره جامعه المنصوره بالفشل الذريع فى التنظيم ولكنها مارست نوع من النصب و البلطجه من خلال فرضها على الطلاب الذين يحضروا الحفلات الغنائيه شراء جريده-صوت مصر- أصدرتها الجامعه مع بدايه المهرجان وممنوع -الدخول بغيرها وطبعا الجريده اتباعت فى السوق السوده ففى اكثر الحفلات حضور من الطلاب - حفله محمد حماقى وصل سعر الجريده لعشرين جنيه ، وطبعا الطلاب نزلوا شتيمه فى الجرنال و اللى عمل الجرنال و اللى بيكتبوا فى الجرنال وماكان من الطلاب الا انهم فرشوا الارضيه كلها بالجرنال بعد الحفله ،فكيف لجامعه مثل جامعه المنصوره ان تقوم بهذا النصب بالاضافه الى فشلها فى تنظيم مهرجان عادى جداوهل ستقوم وزاره التعليم العالى بمحاسبه رئيس المهرجان وهو رئيس جامعه المنصوره عن ماحدث ؟

يعتبر أخطر ما كان فى هذا المهرجان ليس انعدام التنظيم او النصب على الطلبه ولكن فى تصريحات ضيوف المهرجان المتمثلين فى الدكتور هانى هلال و الدكتور مصطفى الفقى رئيس لجنع الشئون الخارجيه بمجلس الشعب وصاحب فضيحه تزوير انتخابات مجلس الشعب فى دائره دمنهور، وساتناول تصريحاتهم حسب يوم الندوه:
ندوه الدكتور هانى هلال بدأت الساعه الثالثه عصراا وميعادها المفروض 12 ونص ظهرا ماعلينا ما اصلها حكومه الكترونيه المهم الدكتور الهمام بدأكلامه باننه ينقل تحيات بابا مبارك وتوجيهاته لرعايه الشباب وان الشباب هو مستقبل وحاضر مصر واحده قاعده جنبى قالت معلش بس حاضر مصر قاعد فى الشارع يشحت الايام ده وقعد يتكلم شويه كلام مالوش اى لازمه عن الكتاب الجامعى وانه هايقضى عليه بس ان شاء الله بعد مايقضوا تماما على ميزانيه الاهالى اللى بتدفع عشان عيالهم يشتروه ، واتكلم عن تغيير اللائحه الطلابيه وعن ان الوزاره هاتدفع اى مبلغ تطلبه الجامعات وان المشروع الجديدللوزاره انها هاتجوزنا وتجيب لنا شقه وتشغلنا يا حلاوه يا ولاه هى الحكومه اغتنت فجاه بعد ادعائها الفقر و الفلس طيب تدفع الاول المصاريف اللى بيدفعها طلبه الاتحادلأى نشاط بيقموا بيه ،ووبعد كده تلقى اسئله من الطلاب وكان اجمد سؤال اتوجه لهانى هلال من طالب فى اتحاد المنوفيه
قاله انه فى لقاء سابق مع طلاب الجامعات تحدث برضه فى نفس الكلام عن الكتاب الجامعى وعن تغيير اللائحه الطلابيه وكالعاده مفيش اى تغيير بيحصل طبعا تيجى تشوف رد الوزير على كلام الطالب هتلاقيه بيهزى تقريبا وبيقول حاجات ماتتفهمش المهم انه يتوه الطالب
وعند سؤال طالبه عن الظلم الذى يتعرض له الطلاب من الاساتذه الجامعيين كان رد الدكتور هانى كل تبرير ليهم ويقول ان من يخطئ من الدكاتره يكون بدون قصد ويمكن يكون واحد اواتنين بجد الدكتور هانى عنده حق واحنا ياطالبه مفتريين وظالمين وعاوزين ندخل النار بنفترى على الدكاتره اللى زى الملايكه، حررررررررررررام عليكم اتقوا الله حكومه و وزاره بنت ستين فى سبعين.
وتحدث الوزير عن رفضه ان يتلقى طالب جامعى أوامر بالتليفون من خارج الجامعه طبعا قاصده الاخوان وانه يشجع التعبير عن الرأى داخل الجامعه و الاختلاف فى الرأى ما يعرفش ان مجهودات رئيسه الرائعه فى تغييب الشباب المصرى جعلت الاختلاف بين الشباب على حاجه واحده هو البنت ده بتاعت مين وسجاره البانجو ده بتاعت مين هذا هو الاختلاف والتنوع الذى تشهده الجامعه المصريه بالاضافه اللى سياده ثقافه المشى تحت الحيط بين الشباب.
نجى بقى للدكتور مصطفى الفقى اللى ندوته كانوا بيلموا ليها ناس عشان تحضرها لدرجه انهم جابوا عمال وفراشين عشان يملوا كراسى وطول الندوه االناس بتقوم لدرجه ان الدكتور مصطفى لاحظ ده،الندوه كانت عباره عن اسئله من الطلبه وكانت بتدور عن السياسه الخارجيه معظمها واحو ال الدول العربيه ماعدا سؤالين فقط عن الحال الداخلى لمصر واحلى حاجه فى كلاك عمنا مصطفى انه كان بيقول ان احو النا غلط بسبب السياسات الخاطئه طيب وياعم الحاج مين اللى واضع السياسات ده مش الراجل اللى انت قاعد تمجد فيه ليل نهار وطول النوده قاعد تقولنا بتوجهات السيد الرئيس مش هو ده اللى خربها وقعد على تلها وجاب لينا امثالك يحاضرونا فى الجامعات عشان يربونا على النفاق زى حضرتك الملاحظ ان الدكتور كان هادئ جدا فى تناوله واجابته عن الاسئله لكن اول ما فيه صحفى فى جريده الوفد ساله عن موضوع التزوير بتاع الدائره الانتخابيه بدمنهور الراجل اتنفض من مكانه وزعق وقال انتوا مش هاتبطلوا الخو ض فى المسائل الشخصيه وانه لو المحكمه اثبتت ان كان فيه تزوير ان هاسيب المقعد كان الراجل مش عارف انه مزور الدنيا كلها عارفه واسم النبى حارسه وصاينه مش عارف ان جمال حشمت مرشح الاخوان هو اللى نجح فى دائره دمنهور وبمنتهى الصراحه انا كان عندى سؤال محشور فى زورى اظاهر لو كنت قلته للكتور مصطفى كان قال لهم اقتلوه ولا طخوها بالنار ولحظه الحلو ان الوقت ما سمحش انى اساله لكن السؤال لسه موجود ولسه باطرحه وهو
ياترى يا دكتور مصطفى بعد اعترافك فى حلقه من حلقات البيت بيتك مع تامر امين انك نافقت كتير ووان طبعا النفاق ده من اجل الحلم الذى لازال يراودك وهو ان تكون وزير كيف تجرؤ ان تخاطب طلاب وجماهير ووتفتخر بنفسك وان تقلدت مناصب مش عارف ايه والفت كتب وانت مجرد منافق ساعى للسلطه وان كلامك عن ان وزير الثقافه اخطئ وانك ترى انه تكلم بروح الفنان ويجب عدم الخوض فى معتقدات الناس من يصدق ان هذا ليس سو ى كلام سياسى منافق وظيفته اللعب بالكلام ؟
البوست القادم هاتكلم عن احسن واجمل حاجه فى المهرجان الزباله ده وهو ندوه الدكتورمحمد هدايه

Read more...

رد طلا ب الاخوان فى جامعه المنصوره على هلاوس وزير الثقافه

>> Wednesday, November 22, 2006




نظم اول أمس طلا ب الاخوان المسلمين بجامعه المنصوره مسيره احتجاج على تصريحات الوزير الفنان سابقا المعتكف حاليا فاروق حسنى ووقف المحتجون أمام مدرج المهدى فى كليه تجاره ورددوا هتافات مثل غضبه غضبه يا شباب و الاسلام عمره ماغاب ، وقلنا حجاب قالوا رجعيه امتى هاتبقى اسلاميه ..
كما حمل المتظاهرون لافتات مكتوب عليها احاديث نبويه وايات قرانيه تؤكد على فرضيه الحجاب على الفتاه المسلمه ، والقى احد المتظاهرين كلمه استنكر فيها انه كيف فى بلد الازهر وعلمائ المسلمين وقبله الثقافه الاسلاميه أن يقال فيها أن الحجاب بدعه.
علق المتظاهرين لافتات فى الجامعه تتهكم على تصريحات ئي الوزراء بانس مصر علمانيه وتصريحات الزير المتعكف فىبيتهم مثل مشايخ بتلاته مليم و اركان الاسلام أربعه وغيرها من الهلاوس التى اطلقها الاخ الفنا فى أطار- خريه علىراى الخواجه- الرأى و التعبير وسبه وقذفه لطائفه كبيره من المجتمع المصرى حتى لو كان الحجاب بدعه وضلاله فان ماقاله يدخل فى اطار المساءله القانونيه ده لو احنا فى بلد فيها قانون اصلا .
والمثير للضحك جدا اثناء الاحتجاج كان فيخ شباب من طائفه الروش طحن جدا بيتريق على الناس اللى اتهفت وثارت على أ هانت امهاتهم واخواتهم ، وأن شاء الله نلاقى مظاهره حاشده قامت بها حركه شباب من اجل خلع ملابس الفتاه
المصريه بقياده فوفو حسنىو المثقفين المصريين اللى عاوزين يشوفوا جمال البنت المصريه
واجدع سلام للرجوله

Read more...

اتحاد الكوسه فى جامعه المنصوره

>> Friday, November 17, 2006

كان المفروض اكتب البوست ده من مده ليتناسب مع توقيت المناسبه الخاصه به ولكن لظروف قهريه جدا لم يكتب الا اليوم وزىما بيتقال كل تاخيره وفيها خيره و الخيره الخاصه بالبوست ده الاعلانات الجامده اللى قام بها الصديق محمد عادل فى مدونته و والتحدث عنها فى مؤتمر الطلبه فى نقابه الصحفيين و اللى قرأ اوحضر المؤتمر هايعرف ان المدونه اللى تحدث عنها محمد هى أنا وبلا أدنى فخر .
طبعا فى البوست ده مش هاكرر نفس الكلام اللى تحدث عنه محمد لأنه تحدث عن جزء من كل و فصل من حكايه وبمنتهى الصراحه انا عن نفسى يمكن اخدت وقت على ما فهمت مغزى دخولى اتحاد الطلبه وعلاقه حادثه بسيطه –دخولى اتحاد الطلبه- فى وجهه نظر ناس كتيره بحياتنا كلها فى أرض المحروسه .
ومن هنا هاحكى الحكايه من البدايه لعلها تكون عبره للبسطاء أمثالى :
البدايه جاءت عندما قررت -وأنا داخله عامى الدراسى الجامعى الثانى أن اشارك فى النشاط الطلابى فى كليتى لأن الحياه الجامعيه مش حلو تكون محاضرات وكتب ودكاتره وبس وأكتشفت فيما بعد أن مادام أنا بادرس فى جامعه مصريه حكوميه هى لازم تبقى كده بس ،ومن روح الحماس اللى كانت مسيطره على أجوائى الداخليه والخارجيه أتهفيت فى عقلى مش انا لوحدى كان معاى اتنين من اصحابى ورحنا رعايه الطلاب فى كليتى المصونه نقولهم على رغبتنا فى ممارسه نشاط ، بمنتهى الصراحه موظف فى رعايه الطلاب استقبل حماسنا بأسلوب رائع وعرض علينا أن احنا ندخل اتحاد الطلاب ومنه نقدر نمار س الأنشطه ده ، كان رد فعلى انا وأصحابى هو الرفض لان احنا ما نعرفش ايه هو اسلوب الاتحاد وان احنا عاوزين نمارس النشاط من خلال اسره نكونها، وتكررت بعد ذلك الزيارات لهذه الموظف نساءله عن حاجات خاصه بينا وكل مره يقول على موضوع الاتحاد لحد ما قلنا خلاص حد فينا يترشح وبعضويته فى الاتحاد يساعد أنشطه الاسره اللى هانعملها ، واخد تلات أسماء من اصحابنا ليترشحوا فى الاتحاد من ضمنهم أنا وبعد كده ذهبت اليه اكتر من مره أسئله عن الحاجات المطلوبه منى كمرشحه لاتحاد الطلاب وعن موعد فتح باب الترشيح كا ن يقولى بمنتهى الطيبه ما تتعبيش دماغك بحاجات مش هاتفهميها دلوقتى ولما باب الترشيح يتفتح هاكلمك وأقولك وانا بمنتهى السذاجه مصدقه الكلام ده لحد ما عرفت فى يوم السبت باليل وخير ىرمضان بيقرأ الجرايد فى برنامج القاهره اليوم أن باب الترشيح لاتحاد الطلاب على مستوىالجمهوريه اتفتحت السبت , قلت اهلا الراجل كان بيستعبطنى ولا أترشحت ولا نيله، تانى يوم رحت ليها وقلت له عن اللى سمعته قال لى ما تخافيش انا قمت مكانك بكل حاجه يعنى سحب الورق بتاع الترشيح وختمه وقدمه كل ده وأنا فى بيتنا ايه الحلاوه ده لو كل طلبتنا فى المصالح الحكوميه تخلص واحنا فى البيت و الله نبقى عايشين فى المدينه الفاضله ، لكن اللى أعرفه ان اللى عمله ده مش لله واكيد فيه مقابل وطلع ظنى فى محله طلب منى انى يوم ما أنجح فى الاتحاد هارشح أتنين بعينهم من الطلبه ليكونوا الامين و الامين المساعد فى اللجنه اللى انا عضوه فيها وان السنه الجايه هايخلينى زيهم امين او امين مساعد يا نهار ازرق هو ايه اللى بيحصل يا ناس هو مش المفروض فيه انتخابات بجد وناس مترشحه وبينهم منافسه ولا من قبل ما الاتحاد يتعمل هما عارفين مين هايبقوا الاعضاء و الامناء وخرجت من عنده وانا فى حيره من أمرى هما ليه بمنتهى السهوله دخلو ا اسمى فى الاتحاد وانا ماليش نشاط طلابى زى ما الائحه 79 بتاعت اتحاد الطلبه بتقول ان المرشح لابد ان يكون ليه نشاط وهى ده حجتهم فى عدم دخول اى حد من الاخوان او اى حد معارضه فى الاتحاد رغم انى عرفت بعد كده بأن الاخوان فى الكليه اتقدموا يوم السبت ومع ذلك تم شطبهم ،كل شئ كان يعتبر عادى بالنسبه للجاى بعد كده للعب على كبير اوى ، يوم ما صاحبتى راحت لموظف الرعايه قبلى وجعلها توقع على ورقه عرفت فيما بعد أنها طعن ضد الاخوان وهى لانها طيبه وواثقه فى الموظف مضت انا بقى لما عرفت جن جنونى وعرفت منها ان عاوزنى أنا كمان اروح أمضى فرحت ليه وانا ناويه نيه سوده ليه فساءلته وكان وشى باين عليه الغضل عن الورقه اللى صاحبتى مضتها وفهمته انى عارفه انها طعن قام تهرب وقلت له عاوزنى انا كمان امضى قالى احنا بنعمل كده عشان مفيش حد احنا مانعرفوش يدخل الاتحاد قلت له قصدك الاخوان قال لى ايوه فرديت ان ده حق الاخوان او غير الاخوان انه يدخل الاتحاد فقالى انه ابتدى يقلل من كلامى وانىزى ما اكون هاوديه فى داهيه فقلت فى بالى اطمنه وقلت له انا لااسمع لا ارى لا اتكلم قالى ايوه كده مظبوط ،خرجت من عنده وانا عاوزه اعمل حاجه قلت فى بالى اروح لحد من الاخوان عندنا فى الكليه اقوله طيب وازاى هاتيجى لى الشجاعه ولكن فعلا رحت سألت طالب،هل حد منهم مترشح فى اللجنه اللى انا داخلها؟ قال لى لا حمدت ربنا وان ذنب اخف من ذنب وانى ماوقفتش قدام حد كان أحق منى .

وخلصت الجوله الاولى للانتخابات و دخلت الاتحاد كعضوه انا وصاحبتى وتم شطب كل الاخوان اللى اترشحوا وجه دورى فى رد الجميل اليوم اللى عمرى ما هانساه من ذاكرتى ابدا الموافق الاتنين 10/11/2006، فى اليوم ده طلبنى الموظف عشان اجى اسمع ليه اسماء الطلاب اللى هارشحهم كأمين وأمين مساعد فى اللجنه بتاعتى وانا يومها قررت انى اطلع من اللعبه القذره ده وقلت له انا عاوزه اطلع من الاتحاد ودخل اى حد مكانى قالى ما ينفعش انا اتعمل عنى تحريات قلت فى بالى اهلا من هنا الحكايه كلها هما عرفوا انى مالش نشاط سياسى ولا بانتمى لاى حزب و الموظف شاف انى طيبه ماليش فى قله الادب ده فقال هو ده اللى احنا عاوزينه وقعد يزن على دماغى عشان احضر الانتخابت النهائيه باليل بعد ما اخلص محاضرات ولأنه أنسان مصرى أصيل كلمنى عن بمنتهى الصراحه عن سبب اختياره لى انه عارف أن الاتحاد مش هايدخله غير حد معين فلما شاف انى عندى حماس وعاوزه اشتغل اختارنى هى وجهه نظر برضه لكن برضه مش ده مبدئى وحضرت تحت ضغط منه وانا مش طاقيه ابص فى عين حد و اللى خلى الموضوع يحلو انى قابلت ناس اول مره اعرفهم من لجان تانيه كل حد عاوزنى اعطيه صوتى وكل واحد يأكد على، بجد كنت قرفانه من منظرهم هما هايموتوا على ايه ؟ ايه النفوذ والمنصب اللى يعطيه الاتحاد عشان يخليهم هايبوسوا رجلى عشان اعطى ليهم صوتى ؟ وبمنتهى التشفى فيهم وعشان اخلص من الزن اللى على دماغى كنت باقول حاضر طيب لكل حد يجى يكلمنى و جه وقت الاجتماع اللحظه الحاسمه اللى فيها سقط من نظرى ناس كتير اوى ناس بجد كنت باحترمهم لكنى لما لقيتهم مشاركين فى اللى بيحصل ده خلونى اشوف كل حاجه من منظور تانى الناس ده كانوا دكاتره محترمين وعميد الكليه جايين يقولوا لينا الشفافيه والديموقراطيه فى الاختيار و كان هاين على اقوم اقلهم بجد منظركم يوحى بالغثيان وهما عارفين الاتحاد ده متطبخ ازاى وقبل مان جتمع بيهم كنت عارفه مين الامين و الامين المساعد بتاع كل لجنه و الامين العام بتاع اتحاد كليه الاداب جامعه المنصوره المصونه .يومها كانت الصدمه فى أن الناس ده هما أساتذنا و الدكاتره اللى المفروض نحترمهم و القدوه اللى بنحتزى بيها ، لكن قدوه ايه وهباب ايه وهما معظمهم ان ماكانش كلهم حزب وطنى يومها خرجت من الاجتماع مخنوقه اوى كنت عاوزه اعيط عاوزه اكدب نفسى ان دول الناس اللى هاتطلع شباب المفروض يحكموا مستقبلا هذه البلد عرفت ان الكلام عن الاصلاح سراب خيال اوهام بجد بعد اليوم ده غيرت حساباتى فهمت اللعبه اللى ماشيه بيها بلد جيمى واصدقائه من يومها وانا اتفتحت قدامى عينى حاجات كتيرهاحكى عنها فى مرات جايه بس بجد هى ده كانت البدايه لانسانه اول مره تتعامل مع البلد ده على حقيقتها
النكته اللى حلوه بجد هو تصريح د/مجدى ابو ريان رئيس جامعه المنصوره فى مؤتمر صحفى مع الاعلامين عن نزاهه الانتخابات وسيره العمليه لانتخابيه بهدوء مع ان قبلها بيوم كان كوردنات الامن المركزى مبيته من باليل قدام شارع البارون اللى قادم البوابه الرئيسيه للجامعه وتانى يوم قامت مظاهرات فى الجامعه كلها بجد هو ده الاستقرار والهدوء التام.

Read more...

مذبحه وسط البلد فى الميزان

>> Tuesday, October 31, 2006

جاءت معرفتى بما حدث من حاله السعار الجنسى فى وسط البلد بالقاهره بالصدفه عند تصفحى مدونه بنت سعد والتى تعتبر أفضل المدونين الذين تناولوا تحليل الحادثه ,ومن مدونتها انتقلت الى مدونه مالك مصطفى لمعرفه ما حدث بالظبط ,وهناك كانت الصدمه والمفاجأه التى أعقبها حاله من الذهول وعدم التصديق لما أقرا من أحداث وأشاهد صور وأتصفح التعليقات الوارده فى المدونه التى تراوحت بين مصدق ومكذب ومصدوم, أغلقت المدونه وانا غير مصدقه أن تكون هذه شوارع مصر وهؤلاء رجالها وشبابها يهتكون اعراض بناتهم واخواتهم علنيا وجهرا هكذ , فابأى حال من الاحوال لم يكن تصورى أن واقعنا المصرى وصل لهذه المرحله من الهمجيه والوحشيه , لكن دهشتى لم تدم طويلا حيث أكد الزميل الدكتور عمرو مجدى (مدونه طرقعه كبيورد) أن مالك أكد له هذا الكلام وان مثل هذه الانتهاكات متواجده بكثره فى الاسكندريه و القاهره .
اذن أصبحنا أمام واقعه حقيقه حدثت شهدت على ثلاث أشياء:أولا: تدنى المستوى الاخلاقى للشعب المصرى ,ثانيا : غياب الامن تماما فى منطقه حيويه فى القاهره ومعه غياب الرادع القانونى لهؤلاء فمع وجود قانون يسقط العقوبه عن المغتصب أذا تزوج المعتدى عليها, فما ذا ننتظر من هؤلاء الذئاب البشريه؟ , ثالثا: سياده ثقافه البلطجه التى تتبعها الحكومه ومن ثم الشعب .
وسائل الاعلام أين انت مما حدث؟
عندما أتجهت لوسائل الاعلام لأشاهد تغطيتها لهذه المذبحه- التىكانت بمثابه زلزال ضرب فى قيم المجتمع وسلوكيات الافراد- لم أجد أدنى اهتمام ففى الجرائد لم يتعدى ذكر الحادثه سوى خبر فى جريده الجمهوريه 3سم فى 3 سم ولم يذكر فى أى جريده اخرى مستقله أو حزبيه أ وحكوميه , اللهم الا أمس فى جريده المصرى اليوم جاء ذكر الموضوع فى صوره مقالتين وخبر ,مع أن ما حدث يعتبر مؤشر بالغ الاهميه للدلاله على أن الحديث عن الاصلاح والتغيير سراب سراب.
أما تناول اكثر البرامج المشاهده لهذه الحادث- القاهره اليوم والعاشره مساءا - كان بمثابه الصدمه ففى برنامج العاشره مساءا اعتقدت ان اول ما تتحدث عنه المذيعه هذا الموضوع ولكن لم يذكر عنه شئ الا من الضيفه الصحفيه وثانى يوم جاء بيان الداخليه يكذب ما حدث وانه لم يقدم بلاغ للنيابه بشأن الحادث.
أما برنامج القاهره اليوم لم يتحرك الا أمس حيث تحدث الأعلامى عمرو أديب للمره الأولىعنه وطالب وزاره الداخليه بفتح تحقيق فورى لان ماحدث ليس بالشى الهين وف ى البرنامج جاءت الفنانه علا غانم -فى اتصال تليفونى-كشاهده على الواقعه ومواطنه اخرى شهدت الواقعه .
فالملاحظ أذن أن الاعلام لم يتحرك الامتأخر جد ا مع عدم تحرك أمنى حتى كتابه هذا البوست,ومنذ علمى بحدوث هذ ه المذبحه وانا اطرح على نفسى الكثير من الاسئله التى وجدت من الضرورى أن اشرك فيها غيرى من الفتيات فى محاوله منى لايجاد اجابه أو حل, طرحت اسئلتى على عشر بنات و وساورد الان رارئهم وملاحظتى على ماقالوه.
رأى البنات فى مذبحه وسط البلد؟
ملاحظتى الأول :أن كل البنات التى تحدثت معهم لم يعلموا أى شى عن ماحدث حتى أمس وبالطبع قمت بالحديث عن ماحدث و الذى ساعدنى أن يصدقوا كلامى هو جر نال المصرى اليوم اللى وزعته على الدفعه .
ملاحظتى الثانيه:كلنا اتفقنا على عدم الحديث فى مثل هذا الموضوع مع أهلنا و الا هانتحبس ومفيش جامعه ومفيش خروج من أساسه.
البنات اللى سألتهم اعمارهم تراوحت بين 18 و19 سنه وكلهم جامعيات
لبنى : السبب الرئيسى فيما حدث الحكومه وماحدث بمثابه ثوره الشباب على الحكومه , اما ما ذا نفعل كفتيا فمنذ معرفتى بالموضوع انا ماشيه الف حول نفسى فى الشارع وهانلبس بقى من هنا ورايح طبقات من الهدوم على بعض واصبح حمل سلاح ضروره لابد منها .
عايده:أ نا عندى ذهول مما حدث و اللى نعمله كبنات ن قبل ما نخرج الصبح نقرا الادعيه وايه الكرسى ونتوكل على ربنا وهو اللى يحمينا فى وسط الغابه ده وكل واحده تخرج وهى ورزقها هاترجع تانى ولا لأ!
ايمان :قالت بأن هذا الشباب مستثار طو ال ا لوقت فهو عاطل بلا عمل وووقته يقيه فى القهوه مع مشاهده الاغانى الاباحيه وعلى النت و المواقع الجنسيه مع الفتيات السافرات فى الشوارع فاصبح الشاب منهم كالقنبله التى انفجرت فينا بالاضافه الى أن هذا الشاب يعلم أنه لن يعاقب من القانون
أما هند وهبه وساره رأت ان ما حدث كارثه وسببه الحكومه وغياب التدين الحقيقى ووعدم قيام الامن بدوره فهو تحول فقط الى قامع للمظاهرات
اما عن اقتراح الفتيات ماذا نفعل وما وسائلنا الدفاعيه فهناك اقتراح قدمته ايناس بحمل مطوه واكيد مش هاتبقى واحد لان هانعمل مقاسات مطوه لشخص ومطوه لاتنين وهكذا حسب العدد ,وسمر اقترحت أن نحمل زجاجه ميه نار برشاشه عشان تبقى سهله الاستخدام اما اقتراح و الدتى العزيزه بنى لازم اتعلم كارتيه من هنا ورايح

حسبنا الله ونعم الوكيل فى وطن تغتصب بناته علنيا وفى الطريق العام

Read more...

عاوزه فانوس

>> Saturday, September 23, 2006


يا بنتى خلصى بقى شغل وبطلى دلع ، أنا عندى شغل كتير لازم يخلص قبل ما رمضان يجى هو أنا هافضى أمتى شويه ده كانت ماما وحاوراها اللذيذ معاى عشان خناقه رمضان وانا بطبعى أقولها هو مفيش حد غير ى فى البيت ده يا ناس نفسى أحس أن ده رمضان مش اللومان وفجأه أختى بتاعت الثانويه العامه تتدخل فى المناقشه عشان تولعها عيال اخر زمن والله مش ينقطونى بسكاتهم ويجى الجيل التانى فى أسرتى الكريمه يطالب بحقه فى استقبال رمضان هاتى فلوس نجيب صاوريخ وحاجات نعلقها على العماره اشمعنى أحمد جارنا ،وأبله اللى هو أنا تكع الفلوس خد يا ابنى بس ابقى افتكرنى وقت الزنقه .
هكذا أستقبلت زمضان هذا العام مناقشات لذيذه من هذ النوع مع روح قلبى ماما مع تسخين من جانب اختى العزيزه على نظام شحاته من أخواتى الصغيريين ، يا سلام
مش مصدقه أن رمضان جه أخيرا فضيت مع نفسى شويه عشان أحس بالاحساس الجميل اللى كنت بأموت عليه وأنا صغيره , ذكريات وأحاسيس حلوه أسترجعتهم فى هذه اللحظه وأنا أكتب اسام ما كنت أصمم انى احط الفانوس جنبى قبل ما انا م فى ليله رمضان واقعد اتخانق انا واختى على مين فانوسه احلى من التانى واقعد استنى بكار والكرتون اللى كان يجى قبل الفطار ، ده كانت أيام دلوقتى قبل الفطار باكون باجهزه وبعده طبعا باصلى وادخل اموت شويه واقوم الف فى الطاحونه من تانى لكن زمان الواحد كان بيتفرج على المسلسلات بمزاج ,دلوقتى كل المسلسلات زى بعضها والواحد قوم يصلى ولا يقر ا فى القراءن افضل ولو بقى وقت اروح اجهز السحور احسن ، دايما شعور الاطفال رائع وجميل بكل حاجه بتحصل فى حياتهم يعنى مثلا كل حاجه بتحصل دلوقتى ليها شعور مختلف تماما عن شعورى بها لما كنت طفله مفعوصه أقدر اسميه الاحساس الفريش النضيف البرئ اووووووى دلوقتى وانا باتذكر ذكريات باسال نفسى ياترى مش ممكن أستعيد هذه الاحساس تانى الاجابه اى نعم بسعاده اللى حولى ومساعده غيرى واحساسى انى ممكن ادخل سعاده على ، وده فعلا كنت بالاقيه فى ماما لما كانت يجى من عشر سنين الاقيها بتعمل فى شنط رمضان وتوزعها على كل اللى تعرفهم محتاجين كنت باستغرب قد ايه هى بتبقى سعيده يكده لكن دلوقتى لما كبرت عرفت وكمان خلتنى اشاركها الواحد بجد حس بسعاده حلوه اوى يارب كلنا نشعر بالسعاده ده ويكون رمضان يعدى علينا بخير ويارب انصر اخوانا فى الاسلام كل مكان فى الدنيا

Read more...

البرقيه قبل الأخيره

>> Monday, September 18, 2006

عندما تملكها الفرح والحماس ،فى حركه عفويه قفزت من على السرير متطاير فستاناها الأبيض- الذى تبدو فيه كملاك من الجنه او كالحور العين-بفعل النسمات التى تناثرت فى أرجاء حجرتها متسلله من نافذتها المطله على حديقه صغيره تبدو كقطعه من الجنه وكأنها تنافس الفتاه فى رقتها وجمالها ، واسرعت الى المراه ممسكه بمشط تنسق بها شعيرات تنسدل على جبهتا الغراء واخذت تسدل شعر فى سواد الليل على كتفيها وونظرت الى المرأه للتاكد من وضع احمر الشفاه على ثغرها الدقيق ،و كا ن فى عيناها بريق طالما غاب عنها وفرحه طالما خاصمتها ، فكانت تبدو فى هذه اليوم أكثر جمالا عن كل يوم ورأت فى الحديقه جمالا لم تره فيها من قبل طالما وجدتها غابه تائهه فيها ولا تتكمن من الخروج منها وبعد التأكد من هيأتها تطلعت الى الشرفه واقفه منتصبه ممشوقه القوام تنتظر من طال غيابه وأشتاقت العين الى رؤياه والقلب الى حماسه والعقل الى حكمته ، ، وانتظرت وطال الانتظار فهذ ه لم تكن المره الأولى التى يبعث لها ببرقيه يبشرها فيها با قتراب موعد قدومه ، وفى كل مره كانت كلماته تنبض بالحماس والقوه والثوره الأمل فى الوصول اليها وتخطى صعاب لم توضع فى طريقه هو فقط بل فى طريق كل من حاول الوصول اليها وتحريرها فكل من حاول أن يكسر السجن الذى فرضه عليها أبوه كان مصيره الفشل ولكنه شاب لازال فى ريعانه لعله يصل قبل أن يورثها الى اخاها أو زوج مثله يعيشها فى نفس السجن المفروض عليها منذ 25 عاما وهى أيضا بداخلها رغبه شديده للتخلص من دكتاوتريه أباها وتسلطه فهى صارت أنضج من ذى قبل وتعلم أن هناك من يسعى لأنقاذها واعطائها حريه طالما حلمت بها حريه حقيقيه وليست حريه الزيف وعدها بها فارسه النبيل ولكن فى كل مره يسعى الأب جاهد لتحكيم فارسها ومع هذا سرعان ما يستعيد فارسها حماسه ويستمر فى نضاله باعثا لها برقيه يعلمها فيها بقرب وصولها اليها ومع كل برقيه يتجدد الأمل فيها مستشعره الحماس فى كلماته والقوه فى عباراته والصبر فى الوصول اليها وكانت هذه اخر برقيه وصلت اليها ، جاءتها بعد ان كادت تفقد الأمل فى الحياه والحريه والعدل ، جاءتها بعد عقود عاشتها من خلال حكايه الجده والأم عن الذل والقهر اللذان عاشا فيه وكان ممزوج باحلام عن فارس نبيل ياخذهم ولكنه لم يكن سوى سراب ولم يقدم لهم شء عن الحريه التى وعودوا بها ، وأصبحت الفتاه بارقه الأمل لهما من أن تخرج من سجنا تستطيع خارجه أن تتنفس نسائم الحريه والعدل والأمن الحقيقى ،ولكن طال الانتظار فى الشرفه وقامتها الممشوقه بدت وكأنها تعبت من وقوفها منتصبه وكأنها أرادت أن تستسلم لظروفها مجددا ولكن بداخلها صوت قوى يقول لها أنا فى الطريق لقد أجتزت الكثير من الصعاب والطرق الوعره ولم يبقى الا القليل لكى أصل اليكى أنتظرنى ولا تيأسى ، هذا الصوت يتردد قى أعماقها فيعيناها على الانتظار .
فظلت واقفه وهو لم يصل بعد ولكن هل يا ترى سيصل وتظل هى ممشوقه القوام فى كبرياء؟ أم أنها ستلحق بجدتها وامها؟هل ينتصر الأب ومن بعده الأين او الزوج أم يفلح الفارس النبيل فى الوصول اليها ؟ لا اجد جواب ولكن يراودنى شعور بانها البرقيه قبل الاخيره

Read more...

وتلاقينا فى وسط الطريق

>> Monday, September 11, 2006

حياه الانسان طريق طويل ,فيه ناس كتير من زحمه الحياه مش هما اللى بيختاروا طريقهم ولكن بينفرض عليهم وان كنت لا اعفى اى انسان من تحمله جزء كبير فى مسئوليه الطريق اللى بيسلكه فى حياته ,لان احيانا بشكل او باخر ممكن اساهم بخضوعى للظروف او الاشخاص انى أجعلهم يتحكموا فى أسلوب حياتى وكيفيه توجيهها بتسليمهم دفه المركب
لكن أجى للنوع التانى من البشر اللى بيستخدموا عقلهم فى اختيار طريقهم ولا يفرض عليهم هذا النوه من البشر يواجه فى احيانا كتير مشاكل صعبه لتحمله مسئوليه الاختيار ,بيواجهوا نظرات فى عيون الناس لان غالبا اختيارهم لا يحظى برأى الاغلبيه قد ايه ممكن تشعر انك وحيد من غير رفيق فى الطريق فى لحظه ممكن كنت تتمنى انك تكون وسط الناس ده بينهم راضيين عنك بس برضه بتواجهه معاه اختيار صعب انك هاتكون زى الكل مفيش تميز زى ماجيت الدنيا هاتمشى من غير شئ ممكن ينذكر بالخير بعدك من غير حتى ما تحس انك راضى عن نفسك فى حياتك لكن وفى اللحظه ده دايما افتكر مقوله لفيلسوف تقول ان الدنيا ده غابه فيها طريقين : طريق كل الناس بتجرى عليه باندفاع وطريق فاضى اخترت أمشى فيه، الطريق اللى الكل بيجرى عليه ما حدش هايوصل لحاجه فى النهايه بسبب الزحمه لكن طريقى هامشى فيه لوحدى او مع ناس قليله لكن هاوصل فى النهايه،اذن لازم ندفع ضريبه لاختيارنا طريقنا ممكن حتى فى اواقات نشعر غربه مع نفسنا زى ما حصل لى طيله شهريين لكن فى النهايه عقلى وقلبى اتلاقوا فى طريقهم اللى اخيرا هما الأثتنين اشتركوا فى أختياره ،كان احيانا بيساورنى الشك فى أسلوبى وتفكيرى بسبب قبلى لكن دلوقتى وصلت للمرحله اللى فيها تصالح مع العقل والقلب ماعدش فيه تنازع على مثل ماكان يحدث فى الفتره السابقه ، وكمان وصلت للمرحله اللى الاقى فيها رفقاء الطريق لم أعد وحيده فى طريقى علمت أنى وغيرى سنصل فى يوما ما مهما طال مهما تعبنا مهما بكينا سنصل ، دائما هناك نور ينبعث من داخلى ينير لى الطريق مهما اشتد على قلبى الالم دائما ارى نور فى اخر النفق وفى كل مره تصدق بصيرتى وبصرى ويأتى النور ليملأ أركان قلبى وعقلى روحى وسمو بها فوق كل حزن و ألم وضيق.
كل تجربه نمر بها فى حياتنا مهما كان قسوتها ومرارتها فانها تحمل لنا دروس وخبرات لاحدود لها تفيدنا وتدعمنا فى طريقنا الطويل ، وأجمل درس تعملته من الحياه ومن رفقاء الطريق :أحزن ابكى ولكن اعطى للفرح والسعاده مساحه أكبر منهما فى حياتك.

Read more...

ملحق بالتدوينه السابقه

>> Thursday, August 10, 2006


لمراسله ذلك الأحمق الذى يدير العالم الان للتعبير عن رفضنا لعقليته الفذه وما تفعله فى بلادنا يمكن مراسلته على اى من الايميلين التاليين :president@whitehouse.gov او comments@whitehouse.gov

Read more...

أضعف الايمان


بعد ما رأينا جميعا ما يحدث فى لبنان ورد الفعل العربى والدولى تجاه ، على ما أعتقد اصبح عندنا يقين أنه لا مجال لشريعه دوليه وقانون دولى فى عالم تحكمه قوانين الغاب بل احط وأقذر منها ، تأكدنا أن الرهان على الضمير الانسانى الغربى هو رهان فاشل وأيضا الرهان على هؤلاء الرعاع الذين يحكمونا هو رهان أفشل فلنتحرك لنخرج على صمتنا ، نقف بجوار أشقاءنا وما أفعله الان هو أضعف الايمان الذى أطلبه منا كعرب فلنمد يد العون لاخواننا ،فانا فكرت فى ان نجعل فى بيوتنا صندوق نسميه صندوق لبنان نضع فيه كل يوم على الاقل مبلغ بسيط من المال كل افراد البيت وكل اسره تدعو غيرها لعمل ذلك وكل منا يدعو اصدقائه ومعارفه لكى تنتشر الفكره وفى نهايه كل اسبوع او اسبوعين نرسل المبلغ الذى تكون على حساب بنك معين بذلك سوف نذكر دائما لبنان ولن ننساها حتى لاتصبح عراق اخر وبهذا نربى واولادنا على الكرامه والتكافل ، بهذا نعلمهم ان الشرف غالى ، والوطن هو شرفنا ، لذلك ادعو كل من يقرا او يعلم بهذالفكره يعمل على نشرها بكل الوسائل المتاحه وحتى تنتشر يمكننا التبرع على حساب رقم 156156002بجميع فروع بنك مصر المنتشره فى انحاء الجمهوريه يمكننا الان ان نفعل هذه الفكره بين الاصدقاء حتى تصبح فى بيوتنا الهدف منها ليس التبرع فقط ولكن استعادت معانى ودروس عظيمه ضاعت فى بلاد استباح حكامها كل شئ ،وهناك وسيله اخرى للتعبير عن احتجاجنا وهى مراسله ذلك البوش واالتعبير عن رفضنا لما يفعله فى بلادنا العربيه وارسال صور قتلانا وجرحانا ولتكن وسيله اخرى لاحتجاجنا لما يحدث وأقول هذا اضعف الايمان وما فى استطاعتى ولينصرهم الله

Read more...

نلتقى بعد الفاصل

>> Thursday, July 20, 2006

الايام السابقه كان عندى حاله من الاكتئاب والضيق والخمول رهيبه ،سببها ما أشاهده على شاشا ت التلفزيون فى نشرات الاخبار وعلى المواقع الالكترونيه الاخباريه كان حصار رهيب لنفسى ، خنقنى وجعلنىأنسى كل شى اعمله واحبطنى بطريقه لم تحدث لى من قبل ، بالطبع هذا شعور كثير من الناس لما يحدث الان فى لبنان لانه كان بمثابه الصدمه لنا جمعيا ، بس للاسف تأثرى بما يحدث كان كبير أوى لدرجه انى كنت بامسك دموعى بالعافيه وانا مع حد ، كل هذا جعلنى اشعر بان الحياه سوده وان الظلام يخيم على كل شئ حولى ،لا أرى أى بصيص من النور أمامى ، ولكن والحمدلله ربنا استجاب لدعائى وارتفعت معنوياتى قليلا وشعرت بتحسن وخصوصا بعد ما رأيت من خسائر يتكبدها الصهاينه على أيدى مقاتلى حزب الله ، وأن شاء الله ربنا ينصرهم وأن كان العرب لم ينصروهم ، ولانى فى اشد الحاجه لانى اغير جو عشان ارتب افكارى واستعيد نشاطى واتعامل مع يحدث بايجابيه واتخلص من أثار الصدمه ،هاسافر أن شاء الله المصيف لمده عشرين يوم هاغير فيهم البرنامج اليومى لحياتى وطبعا هابتعد عن متابعه وسائل الاعلام شويه وده اكيد هايريح اعصابى شويه ناويه رجع بقلب وعقل جديد أن شاء الله أكتر تفاؤل وأكتر نشاط وكمان هارجع بنشاط أكبر لمدونتى ولحياتى عموما ، ووأتمنى لما أرجع تكون ظروف لبنان أتحسنت ويكون القاده العرب راجعوا أنفسهم واسقطواعن أنفسهم الجنسيه الاسرائيليه التى يحملونها واسترجعوا هويتهم العربيه والأسلاميه اللهم استجيب لدعائى.




Read more...

أين جنه العرب الان؟

>> Tuesday, July 18, 2006

منذ عده أيام وأنا احاول ان كتب فى المدونه عن ما يحدث فى لبنان ولكن دون جدوى ما أشعر به جعل كل شئ يتحجر فى، الدموع فى عيونى والافكار فى رأسى والكلمات فى قلمى وعلى كى بوردى ،عينى غير قادره على تصديق ما تراه
على شاشات التلفزيون وما تقرأه على صفحات الجرائد ، غير قادره على تصديق أن لبنان اصبح عراق اخر وزان ما يحدث الان من تدمير وقتل سيصبح شئ اعتياد بعد أيام قليله ، هل سيأتى اليوم الذى أتعود فيه على سماع سقوط عدد من اللبنانين اليوم وتفجبر هنا وغاره هناك ، هل سأستقبل هذه الأخبار ببرود وروتينيه ، لا أعلم ماذا اكتب انها احاسيس متضاربه من الخوف والقلق والدهشه والاحساس الاكبر هو الاحساس بالظلم نعم الظلم الذى يغمرنى ويجعلنى اتمنى لو فى يدى شى لاقتل الغرب لادمره لو قوفه مع هؤلاء الجبابره واعدم الحكام العرب فى ميدان عام الذين هم أكبر مثال للخسه والوضاعه وكل شى دنئ فى هذ العالم ، أأهان عليهم أن يتركوا لبنان هكذا؟بل ليتهم تركوه فقط بل أخذوا يوجهوا طعاناتهم للمقاومه الشريفه، تخلوا عنك يا لبنان وماذا بيدى غير الان سوى الدعاء والبكاء على بلد كانت هى جنه العرب كانت الجميله المدلله ،وقد أصبحت خرابا دمارا لك الله يا لبنان ولعل تحدث المعجزه ويتحرك العرب قبل فوات الاوان ،فى النهايه أقول ان من يتحدث عن السلام بعد الان فليذهب الى الجحيم ولمن يقول أن حزب الله هو الذى اعطى اسرائيل الفرصه ، أقول له ومن كان أعطى أسرائيل الفرصه لكى ترتكب مجزره جنين ولكى تغتال الرنتيسى والشيخ ياسين وغيرهم وتقتل لنا خمسه من أبناء مصر دون أن يتحرك أحد منذ متى وتلتف دوله الارهاب الى الشرعيه الدوليه والقانون
الدولى ،أسرائيل لا تحتاج أذن من أحد ولذلك فهى لاتعرف غير لغه واحده هى لغه المقاومه والحرب هذا ما ينفع معها ،اما السلام فايا سلام على رأى الستاذه نانسى عجرم

Read more...

فى بيتنا رجل سنه 2006

>> Wednesday, July 12, 2006


اتفرجت النهارده بالصدفه على فيلم فى بيتنا رجل وعلى الرغم من انى كنت مشغوله فى المطبخ لكن ما قدرتش اقاوم سحر الفيلم ده وسبت كل حاجه وقعدت قدامه ،الشئ الغريب أن الفيلم ده ماكنت باطيقه وأنا صغيره وكنت لما حد يجيب عليه أنزل فيه تريقه وكنت معتبره أن الفيلم مش ينفع لزمانا ده -احنا مالنا ومال الفدائيين دلوقتى -لكن من كام سنه كده اكتشفت أن الفيلم ده جه فى وقته بالتمام وهو ده أنسب وقت يعرض فيه ،فى زمن اصبحت فيه الوطنيه أندر من الالماس فى بلدنا واشتغال الشباب بالسياسه يعد من المحرمات الفيلم ده على الرغم من انه معمول فى الستينات الا انى بأحس انه بيتكلم عن مصر دلوقتى ، فمثلا لو بصيت على الشخصيات ابتدأ من الاب اللى مالوش دعوه بحاجه وماشى جنب الحيط والابن اللى على نفس النظام زى والده ولو جيت للشاب الثورى الفدائى اللى بيعتبر غريب وعاوز يأذى نفسه واهله على الفاضى لانه مش بيديه يغير حاجه ، وهناك أيضا الشخصيه المستهتره اللى بيمثلها رشدى أباظه واللى قام أداء دور من أروع وأعظم ادوراه ,لو بصينا حوالينا هنلاقى الشخصيات ده كتير لكن احلى حاجه عجبتنى فى الفيلم أنه قد ايه اظهر وطنيه المصريين وان الواحد مهما كان خايف لكن فيه وقت بيظهر فيه المصرى القوى الشجاع وده اتمثل فى العبقرى حسين رياض لما طلب من أبنه انه يصمد ومايعطيش للبوليس معلومات عن عمر الشريف واتمثلت ايضا فى الرائع رشدى أباظه اللى هو الاخر صمد واتحمل التعذيب على أن يدلى باى شئ ، بجد هما دول المصريين ، مش معقوله هايفضلوا ساكتيين عن الظلم والجبروت كتير هايجى الوقت اللى يطلع المارد من جواهم ويثور على الظلم والاستبداد ، أحلى جملتين فى الفيلم كله اللى بجد بكيت لما سمعتهم لما عمر الشريف بعت جواب لزبيده ثروت يقول لها(من استشهد فى سبيل بلاده لم يمت وعلمى اولادك أن الحريه اغلى من الحياه)هى فعلا الحريه غاليه وغاليه اوى وعشان كده لازم ندفع ثمنها وما نستناش حد ممكن يتعطف علينا ويعطيها لينا بلا مقابل

Read more...

>> Sunday, July 02, 2006

فرض على الامه أن ينقذوا اخوانهم فى فلسطين ويجوز تعجيل اخراج زكاه السنه المقبله لذلك
فتوى الدكتور يوسف القرضاوى
تعالوا نقف ضد الصهاينه والمجرمين ونقولهم فلسطين لن تجوع
حساب رقم 0/1/21090 بنك قناه السويس فرع الدقى أو بشيك باسم اتحاد الاطباء العرب أو نقدا بمقر الاتحاد
القائم على الحمله اتحاد الاطباء العرب لجنه الاغاثه والطوارئ
دار الحكمه:42ش القصر العينى
ت:7961792- ف:7940518-محمول:0101769733/0127457177/0102316336
ارقام التليقونات والعنوان لمن يريد الاستفسار عن معلومات ارجوكم تعميم هذه الصرخه والاستغاسه فى كل المدونات والجروبات والمنتديات
فلنعلم اننا لانحمى فلسطين فقط وانما نحمى انفسنا بهذه المشاركه

Read more...

جدول مواعيد مظاهرات فلسطين

>> Friday, June 30, 2006

من اجل فلسطين ....فلننتفض
من اجل اخراج كافه اسرانا من معتقلات الصهاينه
من اجل بلد عربى تغتصب حقوقه فلننتفض مواعيد مظاهرات من اجل نصره الشعب الفلسطينى
الجمعه: 3/6/2006 المكان جامع الازهر الشريف
التوقيت بعد صلاه الجمعه مباشره
الداعى للمظاهره الاخوان المسلمين وحزب العمل والكرامه والاشتراكيين الثوريين مظاهره حاشده تبدا من جامع الازهر
السبت :1/6/2006
المكان: امام نقابه الصحفيين
التوقيت :السابعه مساءا
الداعى للمظاهره : القوى السياسيه
مظاهره حاشده تبدا من امام نقابه الصحفيين ثم يتبعها مؤتمر النقابه
الاحد :2/7/2006
المكان : نقابه المحامين
التوقيت: الثامنه مساء ا
الداعى لها الاخوان المسلمين والقوى والوطنيه
مؤتمر ووقفه احتجاجيه حاشده
الاربعاء : 5/7/2006 المكان : امام جامعه الدول العربيه
التوقيت : الثانيه عشر ظهرا
الداعى لها : لجنه الدفاع عن سجناء الراى والاخوان المسلمين وحزب الكرامه
مظاهره حاشده امام جامعه الدول العربيه ووفد من كبار رجال المعارضه المصريه للمطالبه بعمل شئ فعال تجاه فلسطين

نرجو تعميم الجدول من فضلكم على كافه المدونات والجروبات
قدسنا لازم يعيش.......... حلمهم لازم يموت































Read more...

كذب الحكام العرب ولو صدقوا

>> Tuesday, June 27, 2006

بعد ما حدث فى اليمن الايام القليله الماضيه ،أصبح عندى اقتناع تام بأنه لايوجد حاكم عربى على استعداد أن يقضى البقيه الباقيه من حياته بعيدا عن كرسى الحكم وان يتنازل عن السلطات الالهيه التى حصل عليها مدى الحياه وتمكنه من التحكم فى العباد كأنه ربهم ويذل انفاسهم وانفاس اللى جابوهم ،فهؤلاء الحكام فقدوا القدره على أن يرجعوا مواطنيين عاديين مثلنا يعانوا ما نعانيه من مشكلات وصعاب هم اساسها ومبدعيها .
واذا اخذنا ملك اليمن (الرئيس سابقا) على عبد الله صالح كمثال لهؤلاء الحكام فسنجد انه لعب نفس اللعبه الذى لعبها مبارك ،فلمن لا يعرف فمبارك اعلن فى خطاب له فى بدايه توليه للرئاسه انه سيكتفى بمدتين فقط ولكنه بعد ما حليت السلطه فى عنيه واوهمت البطانه بانه الذى لم ياتى قبله او بعده قرر ان يتنازل ويتكرم ويتعطف ويستمر يشملنا بعطفه وحكمته وحنكته السياسيه التى بدونها نضيع ونصبح فى ذيل الامم وناوى يقعد معانا لحد ما السر الالهى يطلع.
واذا جاءنا للملك على عبد الله صالح نجد أن له دور كبير فى تحقيق وحده اليمن وهو يمتاز بالذكاء السياسى وتولى حكم البلاد منذعام 1978 اى منذ حوالى 28 عاما يا مؤمنيين تصوروا لما رجل يبقى فى الحكم 28 عاما ويكون غير قادر ان يخلق كوادر جديده على قياده بلده فاى حكمه يتمتع بها واى حنكه اللى اعرفه ان القائد الناجح اللى لما تشيله من موقعه لا يحدث خلل لانه يكون مجهز دائما كوادر قادره على القيام بمهامه ولكن حكامنا العرب بكل تاكيد مايعرفوش حاجه عن كده،فنجاح الواحد منهم يعتمد فى الاساس على هايقتل كام جيل فى سبيل بقائه فى السلطه وهايهدم قد ايه من المعتقدات لدى الناس هذا هو معيارهم بدليل ما اصبح فيه اوضاع البلاد العربيه الان.
فهذا الرجل اعلن من قبل انه اتخذ قرار بعدم ترشيح نفسه للانتخابات الرئاسيه واشاد المحللين بهذه الخطوه وقالوا ده هايشكل خطوه ومبادره جديده فى العالم العربى بان يتخلى حاكم فى العالم العربى عن موقعه بطريقه جديده غير الطرق المعروفه (ان ربنا يخده او يغتال او يتقلب من الحكم بانقلاب) ولكن اتضح الامر اهنا لم تكن سوى مناوره سياسيه منه للبقاء فى السلطه بطريقه تبدو انها جاءت من الشعب ,وتخرج النقابات تطالبه بالبقاء وتشد فى هدومه والنبى لتقعد لاحسن من غيرك هانضيع وبالطبع لانه يهمه المصلحه العليا للوطن فى المقام الاول فسوف يعلن انه تنازل عن قراره من اجل المجاميع الغفيره التى تريد بقاءه ولان الوطن فى مرحله حرجه يجب ان نتكاتف فيها جميعا والخ من النشره اللى كل واحد من الحكام العرب قالها او ها يقولها .
اذن نستخلص من هؤلاء الحكام انه لاامل ان يحكم جيلنا هذا بلادنا لان اذا لم يكن هؤلاء الحكام هم الذين سيستمروا فى حكامنا فطبعا هما تاركيين فينا الخلف الصالح اللى هايحكمنا يعنى هايحكمنا مفيش مفر واللى عاوز يأخد العزا فى الشعوب العربيه كل خميس يطلع المقابر ويقرا لهم الفاتحه قولوا امين.

Read more...

البيضه ...ولا الفرخه ؟؟؟

>> Wednesday, June 21, 2006

النهارده كان عندى اجتماع مع اصدقائى فى الفريق بتاعنا وهو تبع جمعيه اهليه وكنا بنتناقش عن الحاجات اللى نعملها فى الاجازه واتفقنا على شويه حاجات كويسه جدا هاتفيد الشباب اللى فى مدينتى وكمان الناس البسيطه اوى المهم بعد ده كله انتوا مش فاهمين ابه موضوع الفرخه والبيضه ده ........... الحكايه ان احنا اتنناقشنا فى احوال البلد وان البلد ده حالها ينصلح ازاى لو الحاكم اتغير ولا الشعب هو اللى يتغير بمعنى اخر زى ما قرات فى مدونه بلو روز هانمسح السلم من اوله ولا من اخره اصحابى شايفيين ان الحل اننا نمسحه من الاخر بمعنى ان الناس لازم تتغير الاول وهو دورنا احنا فى جمعيتنا وهو ده الايجابيه ولما قلت لهم طيب يا جماعه انتم مش عاوزينا نتكلم فى السياسه خالص عشان امن الدوله قالوا لى ما احنا اللى بنعمل ده برضه سياسه ولما نغير الناس هانقدر نغير الحاكم بس انا فى سرى قلت ابقى حلينى وناس مين اللى هاتتغير انا عن نفسى شايفه انى مش اروح على الموظف الصغير واقوله ما تاخدش رشوه لاحسن كده حرام هايقولى ما تبصى على اللى فوقىوانا لو ما عملتش كده هاعيش ازاى وهايدينى قائمه من الاسباب لا لها اول من اخر يعنى بمعنى اخر شوف الاول رب البيت ازاى كان حاله منصلح حال البيت كله هاينصلح حتى لو فيه عيل متلوف امله هاينعدل بسبب حال البيت كله وفى الوقت ده هيكون دور الجمعيات الاهليه والاحزاب السياسيه هيكون فعلا مؤثر وهايغير الناس لان فى الوقت هايشوفوا اللى حاكمهم مظبوط فهاينعدلوا حتى لو مجبورين انهم ينعدلواوهنا بقى نقنعهم باهميه اللى هما بيعملوه لان هاتكون كل وسائل الدوله بتصب فى هذا الاتجاه مشكلتنا بس حتى الان مش عارفين هى البيضه اللى جات الاول وال الفرخه يا ريت حد يجوب على السؤ ال ده لاحسن دماغى لفت خلاص.

Read more...

عالم جديد.........جديد

>> Sunday, June 18, 2006

كانت بدايه معرفتى بهذا العالم الجديد المسمى بعالم التدوين والمدونيين مثل كثيرين عن طريق برنامج وثقائى الجزيره ولقد انبهرت به لانى وجدت ان هناك شباب بجد غير توتو وسوسو شباب قادر على التعبير عن رايه ومستعد ان يفعل اى شى من اجل رايه وهذا الشباب خلق لنفسه من ثوره اتكنولوجيا والمعلومات منفذا للتعبير عن ما يدور فى راسه وعن افكاره وعرفت ان العيب ليس فى جيلنا ولكن فى الاجيال التى سبقتنا التى تريدنا ان نمشى جنب الحيط ونبعد عن الشر ونغنى له وغيرها منالعبارات التى تربينا عليها منذ الضغر على اساس انها مسلمات ومن يريد ان يثور على هذا الذل والهوان ويقول انا انسان لى حقوق يجب ان اطالب بها يكون من مصيره من اهله قبل الحكومه معروف لذلك وجدت فى عالم التدوين فرصه للتنفيس والتعبير عن ما يجول بخاطرى وعن ما احلم به لعله فى يوم من الايام يصير حقيقه على ارض الواقع فكم من الاحلام اصبحت موجوده على الارض الواقع لذلك فها هى مدونتى حلمى الذى اريد ان احققه ويكفينى شرف الحلم والسعى لتحقيقه وانه دعوه للجميع ان يكفوا عن محاصره احلامهم وخنقها قبل ان تولد ولنعلم ان من لايحلم لا يفكر ومن لايفكر اصبح كائن اخر غير الانسان وفى نهايه مدونتى اريد ان احيى كل الابطال الذين فى معتقلات نظام قمع الحالميين وادعوا لهم بان يقف جنبهم وان يخلى عند المصريين دم ويشوفوا ايه اللى بيحصل فى اولادهم وابعث رساله مخصوصه للرقيقه دانيا زوجه المعتقل ياسر بدران انا لا اعرفها شخصيا ولكنى تاثرتا جدا بمدونتها الجميله عائلتنا انى ادعو لكى فى صلاتى بان يثبتك الله ويزيدك صلابه وقوه وايمان فانتى مثالا للزوجه العربيه وتحياتى ليافا الصغيره

Read more...

About This Blog

About This Blog

  © Blogger template Sunset by Ourblogtemplates.com 2008

Back to TOP