فى بيتنا رجل سنه 2006

>> Wednesday, July 12, 2006


اتفرجت النهارده بالصدفه على فيلم فى بيتنا رجل وعلى الرغم من انى كنت مشغوله فى المطبخ لكن ما قدرتش اقاوم سحر الفيلم ده وسبت كل حاجه وقعدت قدامه ،الشئ الغريب أن الفيلم ده ماكنت باطيقه وأنا صغيره وكنت لما حد يجيب عليه أنزل فيه تريقه وكنت معتبره أن الفيلم مش ينفع لزمانا ده -احنا مالنا ومال الفدائيين دلوقتى -لكن من كام سنه كده اكتشفت أن الفيلم ده جه فى وقته بالتمام وهو ده أنسب وقت يعرض فيه ،فى زمن اصبحت فيه الوطنيه أندر من الالماس فى بلدنا واشتغال الشباب بالسياسه يعد من المحرمات الفيلم ده على الرغم من انه معمول فى الستينات الا انى بأحس انه بيتكلم عن مصر دلوقتى ، فمثلا لو بصيت على الشخصيات ابتدأ من الاب اللى مالوش دعوه بحاجه وماشى جنب الحيط والابن اللى على نفس النظام زى والده ولو جيت للشاب الثورى الفدائى اللى بيعتبر غريب وعاوز يأذى نفسه واهله على الفاضى لانه مش بيديه يغير حاجه ، وهناك أيضا الشخصيه المستهتره اللى بيمثلها رشدى أباظه واللى قام أداء دور من أروع وأعظم ادوراه ,لو بصينا حوالينا هنلاقى الشخصيات ده كتير لكن احلى حاجه عجبتنى فى الفيلم أنه قد ايه اظهر وطنيه المصريين وان الواحد مهما كان خايف لكن فيه وقت بيظهر فيه المصرى القوى الشجاع وده اتمثل فى العبقرى حسين رياض لما طلب من أبنه انه يصمد ومايعطيش للبوليس معلومات عن عمر الشريف واتمثلت ايضا فى الرائع رشدى أباظه اللى هو الاخر صمد واتحمل التعذيب على أن يدلى باى شئ ، بجد هما دول المصريين ، مش معقوله هايفضلوا ساكتيين عن الظلم والجبروت كتير هايجى الوقت اللى يطلع المارد من جواهم ويثور على الظلم والاستبداد ، أحلى جملتين فى الفيلم كله اللى بجد بكيت لما سمعتهم لما عمر الشريف بعت جواب لزبيده ثروت يقول لها(من استشهد فى سبيل بلاده لم يمت وعلمى اولادك أن الحريه اغلى من الحياه)هى فعلا الحريه غاليه وغاليه اوى وعشان كده لازم ندفع ثمنها وما نستناش حد ممكن يتعطف علينا ويعطيها لينا بلا مقابل

5 comments:

Ahmed Shokeir Wednesday, July 12, 2006 11:23:00 PM  

لقطة متميزة يابوسي لفيلم بالرغم من قوته وحبكته الدرامية والوطنية ، لكن يمر عليه الكثيرين مرور الكرام
وبالرغم من ان الجملة التي ذكرتيها تبدو وكانها كلام شغارات الا انها داخل الفيلم تتميز بالمصداقية العالية

Ali..USA Wednesday, July 12, 2006 11:36:00 PM  

Right freedon is not a gift you have to earn it
When the Egyptian will get angery and get thier freedom
when
what happen to them
thanks
good blog

shoowbash Monday, July 17, 2006 1:22:00 PM  

هاي
الفيلم ده اينعم اظهر وطنيه المصريين
وأظهر يعني الوطنيه فعلا موجوده.. لكن السؤال
هي لسه موجوده
ياتري ..ايام الاحتلال الانجليزي كنا وطنيين اكتر من ايام الاحتلال المباركي ...طب وايه هو السبب
الفيلم اه حلو ...لانه بيفكرنا بحاجات المفروض اصلا مننسهاش ....بس

shabaskandrany Monday, July 17, 2006 8:15:00 PM  

مبروك يابوسى على الاستايل الجديد وطبعا مميزة فى كل حاجة حتى البوست الجديد
اخوكى

حامل المسك Tuesday, July 18, 2006 4:38:00 PM  

الحريه سيدتي
مثل الصحه لايشعر بها وبجمالها الا من فقدها
كوني بخير

About This Blog

About This Blog

  © Blogger template Sunset by Ourblogtemplates.com 2008

Back to TOP