بنتى عندها سنه

علاقتى بيها تطورت كنت فى الأول بأفكر كتير أنى الغيها خالص وانى مش لازم اهتم بيها وارعاها حسيت فى أحيان كتير أنها عبء عليا وأنها مالهاش لازمه فى حياتى وانى أعود لطريقتى التقليديه فى التعبير عن أفكارى فى كشكولى الأزرق الغامق..........لكن لا العلاقه بينا أصبحت شيبه بعلاقه الام ببنتها

بينا حب وروح لما اكتب بوست جديد مزاجى بيتحسن كتير مهما كنت متضايقه حتى لو البوست مضمونه بيقولى انى متضايقه ,

دلوقتى بأفكر دايما أكتب ايه جديد فيها ويكون حلو مش أى حاجه والسلام, أصبح هناك اهتمام جديد فى حياتى هو اهتمامى بمدونتى سعيده بالاهتمام ومعدش بيمثل عبء عليا

و الأيام أثبت لى ان كان تقديرى فى محله تماما لما كان أول بوست فى المدونه باسم عالم جديد وفعلا فى العالم ده اتعرفت على مدونات ناس بعيده عنى فى المكان لكن قريبه فى الفكر وعرفت أشخاص رائعين وناس مش ولا بد

شجعت أصحابى على أنه يعملوا بلوجر وكان فى اول الفريق بتاعى لولا انتيمتى و الباقى اهتم وتابع المدونات وان شاء الله وراهم لحد ما يعملوا هما كمان

كان فيه كلام كتير عاوزه اقوله عن عالم التدوين و المدونيين بس الجو حر اوووووووووى و الكمبيوتر ولع هو كمان

فى الاخر كل سنه و انتى طيبه يا بنت