اهلا اهلا موسم الامتحانات

>> Monday, December 18, 2006


أقبل موسم الامتحانات بكل فرحه وسروره وما يصاحبه من أعراض البكاء و الضحك معا و السرور والكابه سويا مع شويه امرأض نفسيه غريبه مش بتفتكرنى غير فى الايام الجميله ده وكانها تتبع مع سياسه اغنيه سيد درويش زورونى كل سنه مره بلاش تنسونى بالمره.
كل ماسبق هى أعراض لاحظتها على كل صاحباتى منذ احساسنا بان الامتحان خلاص كمان اسبوع وقدامنا مواد محترمه لازم نقوم بيها على أكمل وجه ،وكل واحده تكلمنى أحس أن عندها بلاوى الدنيا وكأ ننا راحين نتجوز مش نمتحن على اعتبار ان الجواز هو رابع المستحيلات -بعد العنقاء و الرخ و الخل الوفى -بالنسبه لشله اصدقائى ، وعلى الرغم من الاكتئاب المسيطر على كل من اعرفهم هذه الايام الا انى و الحمدلله كنت زى الفل وكان عندى شعور بالسعاده وانى مستمتعه بالمذاكره وانى مصممه اجيب تقدير السنه ده على عكس السنه اللى فاتت كنت بافكر ازاى اخلع من الامتحان باى طريقه ومنها دعائى ان الميكروباص اللى باروح بيه الجامعه يعمل حادثه ويبقى جات من عند ربنا، بس يا سبحان الله له فى خلقه شئون بين حالى السنه ده و اللى فاتت وتقريبا اختلاف حالتى عن كل اصحابى فى الوقت اللى كانوا عاوزين يروح لدكتور نفسى - كنت انا باسمع فيروز وباشرب كابتشيو وبارقص وانا باذاكر-لم يستمر هذه الاختلاف طويلا فبقالى اكتر من يومين عندى اكتئاب حاد لا اعلم سببه ومش طايقه كتاب وقاعده ابص من البلكونه زى البنوته اللى فى الصوره واسمع جبار واهو اك واحضان الحبايب لعبد الحليم و الحاله رررررررررائعه ونفسى اعيط ومش عارفه، عاوزه اعمل حاجه مش عارفه ايه هى اظاهر دخلت فى المرحله الخطر من اعراض موسم الامتحانات هو الاكتئاب ثنائى القطبين على راى ماما و المشكله مش عارفه اتكلم اقول ما لى بحالى و اللى مضايقنى اصابنى نوع من الخرس و الحديث عن الذات لدرجه ازعجت كل من حولى ده تكلمنى تقولى نبرات صوتك متغيره انا عارفه لما بتقولى الكلمه باسلوب معين يبقى انتى مبسوطه وواحده تانيه تقولى شكلك متغير مالك ؟
ماليش غير انى مش عارفه مالى مش عارفه اشكى واقول لحد حالى باهرب من اى حد يسالنى ولو سالنى وحسسته انى متضايقه باشعر بعقده زنب انى باضايق الناس بهمومى عشان كده قلت افضفض شويه مع المدونه اكلم نفسى يمكن احس انى افضل يمكن اطلع حاجات مش عارف لسانى يقولها لاصحابى .......... اللى هايقرا الكلام مش هايفهم حاجه وهايقول ده اكيد هلوسه امتحانات بس اللى حاسه بيه انى زى كلامى غير مرتبه فى افكارى فى الوقت الحالى وان فيه عشوائيه فى مشاعرى مش عارفه ايه سببها ولا ايه حلها، الشى اللى اعرفه دلوقتى انى هاقوم اسمع اغنيه الشمال الحزينه يمكن صوت فيروز يغير حاجه فى هذا الموقف المتأزم .

10 comments:

media Monday, December 18, 2006 11:15:00 PM  

يمكن زي ما بتقولي الي هيقرا الكلام مش هيفهمه بس انا مش اي احد دا انا صحبتك يا بوسي
وفي نفس الحاله الي انتي فيها
يلا ربنا معانا ومع كل الي زينا
يارب ننجح يارب

Adel Tuesday, December 19, 2006 1:17:00 AM  

بُسُس
ازيك انت زي الفل واللي انت فيه ده خواء نفسي ليس الا .....يمكن انت بتدوري زي الست ليلى مراد عن الحبيب المجهول وحبيبك هنا مش واد مُز مثلا انما الامان النابع من احساسك بانك بتنجزي عمل ذا قيمة وانت بتدوري عن الامان ده وبطريقة معينة ومتخيلة ان مفيش حد ممكن يكون ده او فاهمه ولذلك انت حاسة بالاكتئاب والرغبة في الدفء



عموما انا سعيد ان انا اتكعبلت وجيت هنا .... انت كمان سعيدة بي صح هههههههههههههه؟

أحمد Tuesday, December 19, 2006 7:26:00 AM  

معلش فتره وتعدى
ربنا يوفقكوا

بيجاسوس المصرى Tuesday, December 19, 2006 10:31:00 AM  

بصراحة انا عجبنى اسم المدونه قوى و قولت لازم ازورها


و اول حاجه اشوفها ادامى الاقيها امتحانات هى الامتحانات فى كل حته
فى بيت اقعد ذاكر
فى الشارع عامله ايه فى الامتحانات
حتى التليفزيون بقيت بشوف ورق الامتحانات

حراااااااااااااام


تحياتى
بيجاسوس المصرى

أجدع واحد في الشارع Tuesday, December 19, 2006 12:50:00 PM  

ربنا معاكو يا رب
وان شاء الله هتكونة من المتفوقين
بس قولى يارب وتذكرى

sharkawoo Wednesday, December 20, 2006 2:19:00 PM  

الامتحانات دي قدر ومكتوب :)

بس لو تم أخذ الموضوع ببساطة الدنيا هتون أفضل.....

يعني حضرتك ممكن تسمعي فيروز وحضرتك مبسوطة وهتعرفي تذاكري...

بس لا تسمعيها وحضرتك حزينة...

أُكتب بالرصاص Thursday, December 21, 2006 11:19:00 AM  

ربنا معاكم

بالنجاح والتوفيق


روحوا
إللهي تلاقوا اللجنة سهلة وتعرفوا تغشوا

جميله بو حريد Saturday, December 23, 2006 12:29:00 PM  

لولا
انا عارفه ان حالتك الايام ده اصعب من حالتى عنبر 7 فى العباسيه فى انتظارنا
مبرمج حر
شكرا على الدعوه
بيجاسوس المصرى
و الله الورقه بقت بتطلعلى فى الحلم
اجدع واحد فى الشارع
ربنا يخليكوا افتكرنوا دايما بدعائكم
sharhawoo
عملت بنصيحتك
المزاجنجى
فى حقيقه الامر مش باحب ليلى مراد ولا حبيب مجهول او معلوم وميرسى على كلامك اللطيف جدا انا الايام ده باسمه فضل شاكر واغنيه فضل شاكر امبارح باليل
اكتب بالرصاص شكرررررررررررا على الدعوه الجامده ده

Yasmine Adel Fouad Thursday, December 28, 2006 10:31:00 AM  

هههههههههههه
فكرتينى بايام الامتحانات
انا بقى اصحابى بيكونوا بياكلوا فى نفسهم و انا بضحك بس مش حبا فى المذاكرة علشان كنت بحس انها باظت و صحتى بالدنيا

بس اتطمنى يابنتى
بابا كان بيقولى ان الشاطر هو اللى بيخاف علشان عايز يكون كويس
:)
و الله بابا ده طيب مش عارف ان فى الزمن ده اللى كان مقضيها طراوة طول السنه هو اللى بيبقى يوم الامتحان فلة

ربنا معاكى
انتى شوفتى الامتحانات قبل كده
ربنا ينتعك منها بالسلامة

محمد البرلسى Monday, January 01, 2007 2:58:00 AM  

السلا م عليكم


كل سنه وحضر تك طيبه


وربنا يوفقك

About This Blog

About This Blog

  © Blogger template Sunset by Ourblogtemplates.com 2008

Back to TOP