مهرجان الهبل و العفونه فى جامعه المنصوره

>> Saturday, December 02, 2006


نظمت جامعه المنصوره المهرجان الأول للثقافه و الفنون فى الفتره من 25/11الى 30/11/2006تحت رعايه وزرير التعليم الواطى والبحث الخرافى هانى هلال وورئيس المهرجان الدكتور مجدى ابوريان و المفروض ان كان فيه برنامج للمهرجان يتضمن حضور فنانين وهم: محمد صبحى ورانيا فريد شوقى ومحمد رياض ويحيى الفخرانى و الاعلامي عماد الدين اديب و الشاعر فاروق جويده و الصحفى اسامه سرايا وولم يحضر منهم احد ده بالاضافه الى ان اللى حضروا الندوات وهم مصطفى الفقى و الدكتور محمد هدايه وهانى هلال لم يحضروا فى الاوقات المخصصه و المعلنه فى جدول برنامج المهرجان مما ادى الى فوضى فى باقى برنامج المهرجان اللى تضمن عرض مسرحيات لطلاب جامعه المنصوره ومسابقات فنيه بين الطلاب الجامعات المصريه وطبعا تاخر حضور الضيوف الكرام اثر على باقى البرنامج بالاضافه اللى ان هدف المهرجان الاساسى وهومشاركه طلاب جامعه المنصوره فيه لم يحدث لان بمنتهى البساطه لم يكن هناك اعلانات تذكر عن المهرجان وعن مواعيد برنامجه واماكن الندوات و العروض، اللهم الا بوستر غبى متعلق فى بعض اجزاء الجامعه مكتوب فيه اسم المهرجان ووتاريخ بدايته ونهايته وغير كده محدش يعرف حاجه وحتى لو عرفوا فهناك انعدام تنظيم بالمره بالاضافه الى عدم حضور ضيوف المهرجان و المفروض ان ده مهرجان تحت رعايه وزير التعليم هانى هلال مباشره ومع هذا فانه لو كان تحت رئاسه فراش كان هايبقى افضل من كده، وتم تلخيص المهرجان فى الحفلات الغنائيه المسائيه و اللى بدائها رئيس جامعه المنصوره بمطرب بحبك ياحمار سعد الصغير وختمها بمطرب قوم اقف وانت بتكلمنى بهاء سلطان وهكذا تلخص مهرجان للثقافه و الفنون فى شويه حفلات ليليه واتضربت الندوات مما ادى الى تضارب فى مواعيد باقى انشطه المهرجان
ولم تكتفى اداره جامعه المنصوره بالفشل الذريع فى التنظيم ولكنها مارست نوع من النصب و البلطجه من خلال فرضها على الطلاب الذين يحضروا الحفلات الغنائيه شراء جريده-صوت مصر- أصدرتها الجامعه مع بدايه المهرجان وممنوع -الدخول بغيرها وطبعا الجريده اتباعت فى السوق السوده ففى اكثر الحفلات حضور من الطلاب - حفله محمد حماقى وصل سعر الجريده لعشرين جنيه ، وطبعا الطلاب نزلوا شتيمه فى الجرنال و اللى عمل الجرنال و اللى بيكتبوا فى الجرنال وماكان من الطلاب الا انهم فرشوا الارضيه كلها بالجرنال بعد الحفله ،فكيف لجامعه مثل جامعه المنصوره ان تقوم بهذا النصب بالاضافه الى فشلها فى تنظيم مهرجان عادى جداوهل ستقوم وزاره التعليم العالى بمحاسبه رئيس المهرجان وهو رئيس جامعه المنصوره عن ماحدث ؟

يعتبر أخطر ما كان فى هذا المهرجان ليس انعدام التنظيم او النصب على الطلبه ولكن فى تصريحات ضيوف المهرجان المتمثلين فى الدكتور هانى هلال و الدكتور مصطفى الفقى رئيس لجنع الشئون الخارجيه بمجلس الشعب وصاحب فضيحه تزوير انتخابات مجلس الشعب فى دائره دمنهور، وساتناول تصريحاتهم حسب يوم الندوه:
ندوه الدكتور هانى هلال بدأت الساعه الثالثه عصراا وميعادها المفروض 12 ونص ظهرا ماعلينا ما اصلها حكومه الكترونيه المهم الدكتور الهمام بدأكلامه باننه ينقل تحيات بابا مبارك وتوجيهاته لرعايه الشباب وان الشباب هو مستقبل وحاضر مصر واحده قاعده جنبى قالت معلش بس حاضر مصر قاعد فى الشارع يشحت الايام ده وقعد يتكلم شويه كلام مالوش اى لازمه عن الكتاب الجامعى وانه هايقضى عليه بس ان شاء الله بعد مايقضوا تماما على ميزانيه الاهالى اللى بتدفع عشان عيالهم يشتروه ، واتكلم عن تغيير اللائحه الطلابيه وعن ان الوزاره هاتدفع اى مبلغ تطلبه الجامعات وان المشروع الجديدللوزاره انها هاتجوزنا وتجيب لنا شقه وتشغلنا يا حلاوه يا ولاه هى الحكومه اغتنت فجاه بعد ادعائها الفقر و الفلس طيب تدفع الاول المصاريف اللى بيدفعها طلبه الاتحادلأى نشاط بيقموا بيه ،ووبعد كده تلقى اسئله من الطلاب وكان اجمد سؤال اتوجه لهانى هلال من طالب فى اتحاد المنوفيه
قاله انه فى لقاء سابق مع طلاب الجامعات تحدث برضه فى نفس الكلام عن الكتاب الجامعى وعن تغيير اللائحه الطلابيه وكالعاده مفيش اى تغيير بيحصل طبعا تيجى تشوف رد الوزير على كلام الطالب هتلاقيه بيهزى تقريبا وبيقول حاجات ماتتفهمش المهم انه يتوه الطالب
وعند سؤال طالبه عن الظلم الذى يتعرض له الطلاب من الاساتذه الجامعيين كان رد الدكتور هانى كل تبرير ليهم ويقول ان من يخطئ من الدكاتره يكون بدون قصد ويمكن يكون واحد اواتنين بجد الدكتور هانى عنده حق واحنا ياطالبه مفتريين وظالمين وعاوزين ندخل النار بنفترى على الدكاتره اللى زى الملايكه، حررررررررررررام عليكم اتقوا الله حكومه و وزاره بنت ستين فى سبعين.
وتحدث الوزير عن رفضه ان يتلقى طالب جامعى أوامر بالتليفون من خارج الجامعه طبعا قاصده الاخوان وانه يشجع التعبير عن الرأى داخل الجامعه و الاختلاف فى الرأى ما يعرفش ان مجهودات رئيسه الرائعه فى تغييب الشباب المصرى جعلت الاختلاف بين الشباب على حاجه واحده هو البنت ده بتاعت مين وسجاره البانجو ده بتاعت مين هذا هو الاختلاف والتنوع الذى تشهده الجامعه المصريه بالاضافه اللى سياده ثقافه المشى تحت الحيط بين الشباب.
نجى بقى للدكتور مصطفى الفقى اللى ندوته كانوا بيلموا ليها ناس عشان تحضرها لدرجه انهم جابوا عمال وفراشين عشان يملوا كراسى وطول الندوه االناس بتقوم لدرجه ان الدكتور مصطفى لاحظ ده،الندوه كانت عباره عن اسئله من الطلبه وكانت بتدور عن السياسه الخارجيه معظمها واحو ال الدول العربيه ماعدا سؤالين فقط عن الحال الداخلى لمصر واحلى حاجه فى كلاك عمنا مصطفى انه كان بيقول ان احو النا غلط بسبب السياسات الخاطئه طيب وياعم الحاج مين اللى واضع السياسات ده مش الراجل اللى انت قاعد تمجد فيه ليل نهار وطول النوده قاعد تقولنا بتوجهات السيد الرئيس مش هو ده اللى خربها وقعد على تلها وجاب لينا امثالك يحاضرونا فى الجامعات عشان يربونا على النفاق زى حضرتك الملاحظ ان الدكتور كان هادئ جدا فى تناوله واجابته عن الاسئله لكن اول ما فيه صحفى فى جريده الوفد ساله عن موضوع التزوير بتاع الدائره الانتخابيه بدمنهور الراجل اتنفض من مكانه وزعق وقال انتوا مش هاتبطلوا الخو ض فى المسائل الشخصيه وانه لو المحكمه اثبتت ان كان فيه تزوير ان هاسيب المقعد كان الراجل مش عارف انه مزور الدنيا كلها عارفه واسم النبى حارسه وصاينه مش عارف ان جمال حشمت مرشح الاخوان هو اللى نجح فى دائره دمنهور وبمنتهى الصراحه انا كان عندى سؤال محشور فى زورى اظاهر لو كنت قلته للكتور مصطفى كان قال لهم اقتلوه ولا طخوها بالنار ولحظه الحلو ان الوقت ما سمحش انى اساله لكن السؤال لسه موجود ولسه باطرحه وهو
ياترى يا دكتور مصطفى بعد اعترافك فى حلقه من حلقات البيت بيتك مع تامر امين انك نافقت كتير ووان طبعا النفاق ده من اجل الحلم الذى لازال يراودك وهو ان تكون وزير كيف تجرؤ ان تخاطب طلاب وجماهير ووتفتخر بنفسك وان تقلدت مناصب مش عارف ايه والفت كتب وانت مجرد منافق ساعى للسلطه وان كلامك عن ان وزير الثقافه اخطئ وانك ترى انه تكلم بروح الفنان ويجب عدم الخوض فى معتقدات الناس من يصدق ان هذا ليس سو ى كلام سياسى منافق وظيفته اللعب بالكلام ؟
البوست القادم هاتكلم عن احسن واجمل حاجه فى المهرجان الزباله ده وهو ندوه الدكتورمحمد هدايه

6 comments:

Anonymous Sunday, December 03, 2006 2:11:00 AM  

أظن أنا كده فهمت سعد الصغير كان قصده على مين بالحمار .

الســـاحر Sunday, December 03, 2006 8:50:00 PM  

انا ابصراحه ماشفتش المهرجان اللى فى المنصوره ده
لكن واضح كميه الزهق اللى انت فيها من التظام الغلط اللى فى الدوله وخصوصا تصريحات فاروق حسنى
ودى انا معاكى فيها بجد
وربنا ويوفقك فى حياتك

Amr Magdi Saturday, December 09, 2006 2:10:00 AM  

إزيك يا بوسي

رائع بجد التغطية ، أنا قرأت أول يوم بس في المصري اليوم عن "بحبك ياحمار" وانزعاج الأساتذة من هذا التخلف والانحطاط

لكن معرفتش إن الموضوع وصل لكل هذا الكم من التخلف والانحطاط الذوقي والأخلاقي في المهرجان إلا من خلال مدونتك

وبخصوص مصطفى الفقي برضوه مرة جه عندنا الكلية في سنة أولى ، والعامل طلع للمدرجات وطلب من الدكاترة إنهم يلغوا المحاضرة عشان الطلبة تنزل تحضر ندوة الدكتور الفقي النائب بالتزوير

ربنا يشفينا ويعافينا من البلد دية يارب

شكرا بجد على التغطية الوافية دية .. أنا قلت لك من زمان هيكون المهرجان دا عامل إزاي

شــــمـس الديـن Tuesday, December 19, 2006 12:11:00 AM  

السلامك عليكم يا بوسي

معلش بقالي كتير مش بدخل علي المدونة العسولة بتاعتك لان النت كان فاصل

المهم
بجد التعليق الاول دا موتني علي روحي من الضحك ....

معلش
نظام فاسد ... طفح الفساد حتي وصل للعنق و للنخاع , بجد مهرجان ( معفن )
ة اعتذر لاني لم اعتد علي استخدام هذه الالفاظ :)

في حفظ الله

جميله بو حريد Tuesday, December 19, 2006 1:10:00 PM  

لصاحب التعليق الاول لحد دلوقتى مش فاهمه يمكن الحمار هد على
الساحر ميرسى بوكو على مرورك
الدكتور عمرو كان قلبى حاسس زيك من الاول ان الفلوس اللى مصروفه على البتاع اللى اسمه مهرجان ده راحه فى الارض
شموسه
ميرسى على كلامك اللذيذ والحمدلله ان فيه حد فهم التعليق الاول يا ريت بقى حد يفهموني وبخصوص النت فكلنا لها النت فى جمهوريه مصر العربيه هو كمان بقى بيعانى من الفساد حتى النت ياربى
اما بخصوص الالفاظ هما يستاهلوا اكتر من كده و الله بس الواحد ماسك لسانه

الحصان الأسود Monday, December 25, 2006 6:01:00 PM  

يانهار

مقالتك توضح مآسي كثيرة جدا سياسيا وتعليميا وإداريا حتى في قلب الجماعات الحكومية

تحياتي

About This Blog

About This Blog

  © Blogger template Sunset by Ourblogtemplates.com 2008

Back to TOP